Iraultzak kale itsuetan gertatzen dira.

 

Liburu aurkezpena, afaria eta kontzertua Arrasaten!

“LAURA ESATEN ZIOTEN” Leire Ibarguren eta Miren Odriozolarekin

MAIATZAK 19 OSTIRALA, 19:00ean KULTUR ATEn

1980 ko hamarkadan, hainbat euskal herritar, internazionalismoaren aldarriari helduta, hego amerikako hainbat herrialdetara joan ziren bertako iraultzetan parte hartzera. Batzuk El Salvadorrera jo zuten eta FMLNk gidatzen zuen matxinadarekin bat egin zuten. Haien artean izan zen orain arte ezezaguna zitzaigun Miren Odriozola. Gudan parte hartu zuen, sanitaria gisa, hasieran, bestelako ardura ugarirekin, gero.
 

“Izugarrizko bonbardaketak egin zizkiguten, eta guk, metraila sahiesteko, arroiletara eta lubakietara egiten genuen ihes”

“Nire uste apalean, abertzale euskaldunok frogatu dugu, gure herria maitatzeaz gain, beste herriak ere maite ditugula, gutako batzuk euren biziak lur haietan uzteraino. Bere herria maite ez duenak maita ditzake besteak?”

(Miren Odriozola, Azpeitia)

  • Ondoren afaria Irati elkartean (afarirako izena eman Irati Tabernan)
  • 23:00etan PANCHO BALBUENA mariatxi mexikarraren kontzertu mundiala!

 

Al Nakba 2017: Euskal Herria Sionismorik gabeko lurraldea izan arte!

Hasteko, gure elkartasun internazionalista bidali nahi diegu Israeleko ziega ilunetan borrokan ari diren milaka preso politikoei. Batez ere, azken egunotan gose greba burutzen ari diren milatik gora preso politikoei. Zuen borroka gure eredu delako!

Gaur, maiatzaren 15ean, palestinarren Nakba berriz ere ekarriko dugu gogora haren 69. urtemugan. Nakba arabierazko hitzak "hondamendia" esan nahi du eta palestinarren exodoa izendatzeko erabiltzen da. Palestinarren Errefuxiatuentzako Nazio Batuen Erakundearen (UNRWA) arabera, gaur egun sei milioi lagun inguru dira 1946ko ekaina eta 1948ko maiatza artean ohiko bizilekua Palestinan izan eta 1948ko gerraren ondorioz etxeak eta bizibideak galdu zituzten pertsonak eta haien ondorengoak.

Egun honetan, eskubideen urraketa jarraia jasaten duten herrialdeekin eta batez ere Palestinarekin gure elkartasuna adierazi nahi dugu. Giza eskubideen etengabeko urraketek, blokeoak, harresiak, apartheid sistemak eta errepresioak ez dute palestinarren askatasun grina zanpatzea lortu. Hala, goraipatzekoa da herri palestinarren 69 urteko borroka luze eta gogorra. Palestinarren erresistentzia, herri zapaldu ororen eredu da, eta horrek munduko internazionalistok prosezu honekiko elkartasuna antolatzera garamatza.

Hamarkada bat pasa da Euskal Herrian BDZ kanpaina martxan jarri genuenetik, eta asko izan dira egindako ekintza eta ekimenak, baita horietan lorturiko garaipenak. Borroka luzea daramagu jadanik eta gure indarrak handitzen joan dira urte hauetan. Euskal Herriak Palestinarekiko duen gertutasuna praktika politiko bilakatzeko ordua iritsi zaigu orain, ordea. Euskal Herria Sionismorik gabeko lurralde bilakatzeko ordua heldu da.

Zentzu honetan, dei egiten diegu euskal internazionalista orori, bakoitzak bere eremuan (kultura arloan, hezkuntzan, instituzioetan, saltokietan...) BDZ kanpaina aurrera eramateko. Eta bukatzeko, zorionak eman nahi dizkiegu Gasteizen Israelen enbaxadoreak diren Maccabiren aurrean tinko mantentdu ziren baskoniazale internazionalistei; Valentziako Rottotom festibalaren aurrean BDZ ekintzaileak defendatu dituzten euskal kulturgileei; instituzioetan BDZ aurrera eramateko egin zen konferentzia antolatu zenutenoi; edota Euskal Herri luze zabalean egunerokotasunean Palestinaren alde eta sionismoaren kontra ingurukoak kontzientziatu eta ekimenak antolatzen dituzuen guztiei.

Gora Palestina Askatuta!
Israeli boikot!
Euskal Herria Sionismorik gabeko lurraldea izan arte!

 

 

Gernikatik Venezuelara konexioa

"Erase una vez un Rey" antzerkia Arrasaten

Maiatzaren 7an, igandean, “Erase una vez un Rey” antzerkia eskainiko digute El Salvadorretik etorritako TNT (Tiempos Nuevos Teatro) taldeak. Antzerkizuna Arrasateko Sebero Altube plazan izango da eguerdiko 13:00ean, eta eguraldi txarra eginez gero, Biterira lekualdatuko da.

 

Sinopsia: Eskean bizi diren 3 lagunek, bizi diren kontestu sozial, politiko eta ekonomikoari ihes egin nahian umorea erabiltzen dute arma gisa. Pertsonaia batzuk sortzen dituzte eta berauek imitatzen dituzte, hauengan ohikoak diren dominazio eta botere harremanak eszenifikatuz. Erregeak, presidenteak, generalak eta beste pertsonaia batzuen errealitatea ikustarazten digute beraien antzezlanaren bitartez.

Maiatzaren 1ean borrokak uztartzen, herriok burujabe!

Askapenaren 30. urteurrena den honetan ere gure irakurketa plazaratu nahi dugu maiatzaren lehenaren harira:

Sistema kapitalista inperialista heteropatriarkalak munduko herriak irentsi nahi ditu, nazio, klase eta genero zapalkuntzaren bitartez, ahalik eta denbora laburrenean ahalik eta etekin handiena ateratzeko. Herriok, langileok eta emakumeok jazartzea da kapitalaren mekanismoa. Horretarako, egitura ugari sortu ditu sistemak, hala nola Estatu burges zapaltzaileak, Europar Batasuna, NATO, Nazioarteko Diru Funtsa edota Munduko Bankua. Denak ala denak, burgesiaren interesak babesteko aparatu politiko, ideologiko, ekonomiko eta militarrak. Horietako bakoitzak irauten duen bitartean, herriok autoritarismoa, menpekotasuna, beldurra eta errepresioa besterik ez ditugu izango aurrean.

Horrela, Europan, gure borroka zelaian, aldaketa ugari ematen ari dira azken aldian. Brexit-a dela, faxismoaren gorakada, Greziak bizi duen egoera neokoloniala, Ukrainako gerra, errefuxiatuen afera... Hauek denek, Europar Batasunak bizi duen krisiaren berri emateaz gain, krisi hori gainditzeko duen ezintasuna argi adierazten dute. Egitura honen barruan, ezinezkoa izango da langileon burujabetza eskuratzea.

Beraz, argi daukagu ez dagoela sistema honen baitan alternatibarik, berau suntsitu egin behar dela. Ezinbestekoa da erasoei erresistentziaz erantzutea. Ezinbestekoa da sistemaren kaiolatik haratago herri boterea eraikitzea. Ezinbestekoa, herri langilea antolatu eta beste mundu bat eraikitzeko borrokara batzea. Gaurdanik loratzen ari den jendarte berria izango baita zapalkuntza horri alternatiba jartzeko gai izango den subjektu bakarra.

Zentzu horretan Askapenatik dei egin nahi diegu euskal internazionalistei maiatzaren 1 honetan antolatu diren mobilizazioekin bat egiteko. Aipamen berezia egin nahi diogu Bilbon arratsaldeko 18:00tatik aurrera herri mugimenduko hainbat eragilek elkarlanean Maiatzak 1 egin ekimenak antolatu duen mobilizazioari.

Gora langileon borroka!

Gora Euskal Herria Sozialista!

Borrokak uztartzen, Herriok burujabe!

Agur eta ohore Justo!

(abajo en castellano)

Borrokak eta erresistentziak markatu dute Justoren bizitza osoa. Faxismoaren aurka borrokatzen zuen Madril errepublikarrean jaio zen 1937an. Berak zioen bezala, bere bizitzako lehen bi urtetan baino ez zen benetako askatasunean bizi izan, Madril erori eta faxistek lau hamarkada luzez erregimen genozida ezarri zuten arte.

Faxismoaren aurka lehenbizik eta bere erreforma politikoaren aurka ondoren, borroka horretara eskaini zuen bere bizitza. Ikasle borrokan ari zela ezagutu zuen bere ibilbide politiko, ideologiko, profesional eta sentimentalaren bidelagun izan zen Margari Aiestaran. Komunista errotik, PSOEko militantea izan zen diktadura garaian, eta alderdiak egin zuen traizio handiaren aurkako borrokalari sutsua izan zen, lortu ez bazuen ere.

Euskal Herrira etorri zen bizitzera, Margariren jaioterrira, eta hasieratik bertatik Herri Batasunean militatzen hasi zen. Herri honen askapen nazional eta sozialaren borrokaren alde murgildu zen sutsuki, Europako txoko txiki honetan iraultza sozialista egiteko konbentzimenduz. Eta hala Justok nola Margarik Estatuaren errepresio gordina jaso zuten, haien etxea metrailatua izanik, eta zorionez, gutxigatik izan bazen ere, onik atera ziren. Baina horrek ez zuen haien grin iraultzailea geldiarazi, hilobira arte eraman baitu borroka.

Fisikoki utzi gaitu Justok, baina ez da alferrik bizi izan, eta gure herriaren, eta baita beste herri borrokalarien borroketan ondare baliotsua utzi du (ondare idatzia ere “Justo de la Cueva Dokumentu eta Artxibo Zentroan” utzi du). Askapenatik ohorez agurtu nahi dugu militante zinez internazionalista, komunista eta abertzale handi hau, gurean ere bere harritxoa jarri baitzuen, formakuntza politikoko saioetan lagunduz. Gu gaur garena Justo izan denagatik ere bagara.

Agur eta Ohore Justo!

 

Orriak

Subscribe to Askapena RSS
randomness